HATAW! D'yaryo ng Bayan hatawtabloid.com
NASAKOTE ang dalawang lalaking sangkot sa insidente ng carnapping sa kahabaan ng JASA Road, Brgy. Dolores, sa lungsod ng San Fernando, lalawigan ng Pampanga.
Nabatid na sinaksak ng dalawang suspek ang biktimang kinilalang si alyas Migs, 21 anyos, residente sa nabanggit na lungsod, at puwersahang kinuha ang kaniyang itim na Toyota Land Cruiser, nakarehistro sa isang G. Zubiri ng lungsod ng Makati.
Kinilala ang mga suspek na sina alyas Reden, 34 anyos, at alyas Ryan, 44 anyos, kapwa residente sa Bolinao, Pangasinan.
Tinangkang pigilan ng biktima ang dalawang suspek ngunit nakaladkad siya ng sasakyan habang mabilis na tumatakas ang mga suspek.
Isang rider ng motorsiklo ang nakasaksi sa insidente at nagbigay ng alerto sa mga kalapit na pulis na nakatalaga sa kahabaan ng Lazatin Blvd.
Sa tulong ng mga tauhan ng SWAT na nagkataong nasa lugar, tinugis ang mga suspek at naharang ang ninakaw na sasakyan na naging sanhi sa pagbagal ng trapiko.
Nang mapaligiran ng mga awtoridad ang mga suspek ay agad na sumuko at dinala sa kustodiya ng mga awtoridad.
Nakuha mula kay alyas Ryan ang isang sling bag na naglalaman ng isang kargadong .45 caliber STI Edge firearm na may Serial No. 287215 at isang magazine na kargado ng siyam na mga bala.
Dinala ang dalawang suspek sa himpilan ng pulisya para sa kaukulang disposisyon habang inihahanda ang mga kasong carnapping, grave threats, serious physical injury, at paglabag sa Omnibus Election Code laban sa kanila.
Kaugnay nito, pinuri ni P/BGen. Jean Fajardo, regional director ng PRO3, ang mabilis na kahandaan ng mga alagad ng batas sa pagtiyak ng kaligtasan ng publiko. (MICKA BAUTISTA)
