HINDI MADEDEHADO ang mga rice retailer at trader sa pagbebenta ng mga imported na bigas sa presyong P50.00 kada kilo.
Ito ang pagtitiyak ng Department of Agriculture (DA) matapos ang masusi at maingat na pag-aaral para sa price cap ng bigas batay sa landed import cost na P37 hanggang P38 kada kilo.
Ang itinakdang P50 kada kilo price ceiling ay para sa 5% broken imported na bigas kung saan ito ay nagbibigay pa rin ng disenteng kita sa buong supply chain.
Ayon kay Agriculture Secretary Francisco P. Tiu Laurel Jr., matapos ang inspeksiyon ng presyo ng bigas sa Paco Public Market noong Martes, 19 Mayo, maingat nang pinag-aralan ng ahensiya ang price cap kung saan nakitang may sapat pang puwang para sa logistics, shrinkage, at makatuwirang patong mula importer hanggang trader at retailer.
Ayon sa Kalihim, ang layunin ng polisiya ay pagpapatatag ng presyo, hindi ang pagkalugi ng mga negosyo. Kasabay ng pagbibigay laban sa sobrang taas na patong habang nananatiling mahigpit at sensitibo sa usaping politika ang pandaigdigang presyo. (ALMAR DANGUILAN)
