P56-M+ shabu nasamsam sa 2 Pinay na ‘drug mule’
NASAMSAM ang mahigit P56 milyong halaga ng shabu ng mga tauhan ng Bureau of Customs (BoC) sa Ninoy Aquino International Airport (NAIA) Terminal 1 sa dalawang “drug mule” na Pinay mula Cambodia.
Sinabi ng mga awtoridad, napansin ang kakaibang anyo at timbang ng mga bagahe ng dalawang pasahero nang lumapag sa NAIA.
Sa x-ray scanning equipment, lumitaw ang kahina-hinalang imahen kaya nagpasyang buksan at siyasatin ang mga maleta.
Tumambad mula sa dalawang check-in luggage ang halos 12 kilo ng shabu na aabot sa P56,603,200.
Isasailalim sa confirmatory laboratory testing ang mga nasabat na substance habang inihahanda ang pagsasampa ng kasong paglabag sa Article ll ng RA 9165 o Comprehensive Dangerous Drug Act of 2002.
