HATAW! D'yaryo ng Bayan hatawtabloid.com
MA at PA
ni Rommel Placente
NOONG June 1, Monday, nagkaroon ng advance screening ang pelikulang Home Along da Riles..Da Reunion, na ginawa sa Metropolitan Theater.
Ang pelikula ay handog ni Manila Mayor Isko Moreno sa mga Manileno.
Noong nagkausap sina Vandolph, na anak ng namayapang komedyante na si Dolphy, at si Yorme Isko, sinabi nito na sa Metropolitan Theater ganapin ang advance screening.
Isa rin kasing Manileno si Dolphy, na bidang lalaki noon sa sitcom na Home Along Da Riles. Bukod pa bilang pagbibigay-pugay sa Comedy King na lumaki sa Tondo.
For the record, sikat na sikat na sitcom noong 90’s ang pelikula. Kaya naman naging dahilan ito para gawing pelikula, at naging blockbuster noong ipalabas.
Isinalin ulit ito ngayon sa pelikula bilang tribute kay Dolphy.
Kasama pa rin dito ang mga gumanap niyang mga anak na sina Claudine Barretto, Smokey Manaloto, Gio Alvaerez, Vandolph, Boy 2 Quizon, na siyang nagdirehe ng pelikula. At siyempre, kasama pa rin si Nova Villa, na gumanap na Azon noon sa pelikula.
Nasa cast din sina Mavelyn dela Cruz at Dang Cruz.
Bago ang screening ay nag-speech muna si Vandolph.
Nagpasalamat siya kay Yorme dahil sa suporta nito sa kanilang pelikula.
“Maraming salamat sa pagpapahalaga ng legasiya ng aking ama. Si tatay Kevin Cosme (ang role ni Dolphy sa HADR),” anito.
Inalala rin ni Vandolph na 6 years old pa lang siya nang mapasama sa nasabing sitcom. Ito ang kanyang first acting experience.
Dahil isa nga ring komedyante si Vandolph gaya ng ama, kaya hinaluan niya ng joke ang kanyang speech.
Sabi niya na natatawa, “Ang tatay ko nga lumaki sa Tondo. Kaya medyo tigas ‘yun. Tiga-saing, tiga-laba. Tiga-mahal ng babae.”
