HATAW! D'yaryo ng Bayan hatawtabloid.com
DINAKIP ang isang lalaking nagpanggap na nakaligtas sa pagguho ng gusali sa lungsod ng Angeles, Pampanga matapos matuklasang peke ang kaniyang hawak na ID sa isang follow-up investigation ng mga awtoridad nitong Sabado, 30 Mayo.
Naganap ang insidente sa command post na itinayo malapit sa gumuhong gusali sa Oak at Teodoro St., sa Brgy. Balibago, sa nabanggit na lungsod, kung saan tumutulong ang mga tauhan ng pulisya sa pagpapanatili ng kaayusan, pamamahala ng mga tao, at pagtiyak sa kaligtasan ng mga apektadong pamilya.
Lumabas sa imbestigasyon na kinilala ng isang timekeeper ng construction site ang suspek bilang ang indibiduwal na nakita sa isang viral video na tumatanggap ng tulong pinansiyal mula sa Department of Social Welfare and Development (DSWD) matapos na magkunwaring isa sa mga nakaligtas sa trahedya.
Nang malaman ang panlilinlang ng suspek ay nag-ibayo ang emosyon sa lugar hanggang napansin ng mga awtoridad ang mainit nang sitwasyon kaya agad silang kumilos upang pakalmahin ang lahat at pigilan ang paglala ng insidente para mapanatili ang kaayusan.
Kasunod nito, inimbitahan ang suspek at ang saksi sa estasyon ng pulisya para sa wastong beripikasyon at imbestigasyon.
Sa panahon ng imbestigasyon, nagpakita ang suspek ng lisensiya sa pagmamaneho upang patunayan ang kanyang pagkakakilanlan.
Ngunit napansin ng mga imbestigador ang mga tila iregularidad sa dokumento, na nag-udyok sa karagdagang beripikasyon.
Isang kahilingan sa kompirmasyon ang naipadala na sa Land Transportation Office (LTO), habang inihahanda ang mga kasong pamemeke ng mga pampublikong dokumento sa ilalim ng Article 172 ng Revised Penal Code laban sa suspek.
Kaugnay ng insidente, pinuri ni PRO3 Regional Director P/BGen. Jess Mendez ang mga nagrespondeng operatiba para sa kanilang pagbabantay at propesyonalismo, na binibigyang-diin ang kanilang mabilis na aksiyon na pagkakadiskubre ng isang posibleng kriminal. (MICKA BAUTISTA)
