HATAW! D'yaryo ng Bayan hatawtabloid.com
MATABIL
ni John Fontanilla
ANG mahuhusay na aktor na sina Jomari Yllana at Joko Diaz ang iniidolo ni Malolos Bulacan Mayor Christian Natividad.
Pareho kasing mahusay at de kaledad na aktor sina Jomari at Joko. Biro nga namin sa butihing mayor ng Malolos na magkamukha sila ni Jomari.
Ayon kay Mayor Christian, “If gagawing pelikula ang buhay ko, aba’y siyempre si idol ko! Dalawa idol ko, kung hindi si Jomari (Yllana), si Joko Diaz.”
Dagdag pa nito, “Si Joko barakong-barako eh, ‘pag nakita mo. At saka pareho ko na silang nakilala, maganda naman mga pagkatao ng mga ‘yun.
“’Yung isa po hindi pa ako mayor, ‘yung isa po mayor na ako (nang makilala ang dalawang aktor).
“Noong araw pati kay Bong Revilla nakasama ako. Kasama ko roon si Michelle Aldana. Si Valentin, ‘yung batang sumikat sa ‘Eat Bulaga,’ ‘yung isa sumikat sa sexy film, si Gandong Cervantes.”
Habang sa hanay naman ng mga artistang babae ay ang Kapuso star na si Rhian Ramos ang hinahangaan ni Mayor Christian, dahil bukod sa maganda ay napakahusay nitong artista.
Ikinuwento rin ni Mayor Christian kung paano siya napasabak sa paggawa ng pelikula.
“Kasi po dati kasama ako sa mga play dito, teatro, once naman yata o twice. Siguro may nakakita sa akin doon hinahatak-hatak ako,” paglalahad ng mayor.
Pero hindi nagtuloy-tuloy ang pagpasok nito sa showbiz dahil hindi naman niya hilig kaya naman napasabak ito sa politika dahil nasa puso ang pagtulong at pagseserbisyo sa kanyang mga kababayan sa Malolos, Bulacan.
“Pero hindi ko naman talaga hilig, at saka alam kong ‘di naman ako qualified ‘di ba? Maraming mas guwapo,” pabirong pahayag pa ni Mayor Christian.
Samantala, malayong kamag-anak naman ni Mayor Christian ang aktor na si Nikko Natividad.
“Medyo malayo, pero kaunti lang naman kaming Natividad dito.”
Balak ding mag-produce ng mga short film at ituloy ang pansamantalang nahintong film festival (Sine Republika #CinemaLolos) sa kanilang bayan dahil sa pandemic noon.
