HATAW! D'yaryo ng Bayan hatawtabloid.com
HONG KONG — Nagpakitang-gilas si Jeralyn Rodriguez sa 22nd Asian U20 Athletics Championships matapos maitala ang pinakamahusay na takbo sa kanyang karera at makuha ang kwalipikasyon para sa nalalapit na World U20 Athletics Championships.
Nagtala ang 19-anyos na si Rodriguez ng oras na 54.83 segundo sa final ng women’s 400-meter run, sapat upang malampasan ang itinakdang qualifying standard na 55.20 segundo para sa prestihiyosong pandaigdigang kompetisyon na gaganapin sa Portland, Oregon, Estados Unidos mula Agosto 5 hanggang 9.
“Masaya ako dahil nakamit ko rin ang matagal ko nang minimithing kwalipikasyon para sa world championships,” pahayag ni Rodriguez matapos ang karera.
Si Rodriguez, na kasalukuyang kampeon sa Southeast Asia U20 category at dalawang ulit na gintong medalista sa Palarong Pambansa sa nasabing disiplina, ay makakasama nina Naomi Cesar (women’s 800m), Ivan Cabanda (men’s 400m hurdles), at Bianca Espenilla (women’s javelin throw) bilang mga kinatawan ng Pilipinas sa World U20 Athletics Championships.
Ayon kay Philippine Athletics Track and Field Association (PATAFA) President Terry Capistrano, ang mataas na antas ng kompetisyon sa Asya ay nagsisilbing inspirasyon sa mga atletang Pilipino upang higit pang pagbutihin ang kanilang paghahanda.
“Ang ating nasasaksihan dito ay ang kinabukasan ng athletics sa Asya. Ang pagganap ng mga atleta mula sa iba’t ibang bansa sa rehiyon sa napakataas na antas ay nagsisilbing hamon at inspirasyon para sa ating mga manlalaro,” ani Capistrano.
“Dahil dito, higit nating pinagbubuti ang pagsasanay, mas pinaghuhusay ang paghahanda, at mas pinatatatag ang ating kakayahang makipagsabayan sa pandaigdigang antas,” dagdag pa niya.
Katuwang din sa pagsuporta sa pambansang koponan, sa tulong ng Philippine Sports Commission (PSC), sina PATAFA Secretary General Jasper Tanhueco, Flubert Cosue, at mga coach na sina Roselyn Hamero at Jonah Genilza.
Nagkaroon ng higit na kabuluhan ang pagkakakuwalipika ni Rodriguez dahil noong nakaraang taon ay naabot na niya ang kinakailangang oras sa Southeast Asian Games sa Bangkok. Gayunman, hindi ito kinilala dahil sa naging aberya sa electronic timing system, dahilan upang hindi maisama ang kanyang marka bilang opisyal na qualifying performance.
“Nanghinayang man ako sa nangyari sa SEA Games, itinuring ko na lamang itong isang hamon upang lalo pang pagbutihin ang aking pagsasanay at pagganap,” ani Rodriguez.
Samantala, patuloy na naghahangad ng medalya ang Team Philippines sa nagpapatuloy na Asian U20 Athletics Championships matapos mabigong makapasok sa podium sina Sep Placido (women’s 5000m race walk), Jecel Vivas (women’s 100m hurdles), Pi Wangkay (men’s 100m), at Alfredo Talplacido (men’s 400m).
Nakatakdang lumahok si Vivas sa women’s 400m hurdles, habang sasabak naman sina Espenilla sa women’s javelin throw at Jerico Cadag sa men’s 3000m steeplechase sa mga kompetisyong gaganapin sa huling bahagi ng Sabado. (PSC/HNT)
