HATAW! D'yaryo ng Bayan hatawtabloid.com
ni MICKA BAUTISTA
APAT na ang narekober na katawan sa search and rescue operations ng mga awtoridad kahapon, Lunes, 25 Mayo habang 17 pa ang nawawala sa gumuhong ginagawang 9-storey building sa Barangay Balibago, Angeles City, Pampanga nitong madaling araw ng Linggo, 24 Mayo.
Nabatid sa ulat ng Angeles City Disaster Risk Reduction and Management Office (ACDRRMO), kabilang sa mga namatay ay isang Malaysian national at isang person with disability (PWD) mula sa katabing apartelle na tinamaan ng bumagsak na debris mula sa gumuhong gusali noong Linggo ng madaling araw.
Nitong Lunes, dalawa katao, kapwa sugatan, ang nakuha mula sa pagkakaipit sa gumuhong gusali ngunit binawian ng buhay dahil sa cardiac arrest dakong 3:00 ng madaling araw ang isa sa kanila habang ang isa pa ay idineklarang patay dakong 10:00 ng umaga.
Ayon kay Angeles City Mayor Carmelo “Jon” Lazatin, gumamit ang mga rescuers ng specialized equipment gaya ng thermal scanning technology at K9 search units sa paghahanap ng posibleng “signs of life” sa gumuhong estruktura.
Samantala, sinabi ni Fire Superintendent Maria Leah Saijili, tagapagsalita ng BFP Region 3, kasunod ng dalawang nauna ay may nakuha pang dalawang biktima ang mga rescuer kahapon mula sa mga guho sa gitna ng patuloy na search, rescue, at retrieval operations.
Sa pinakabagong update mula sa Angeles City Disaster Risk Reduction and Management Office (ACDRRMO) na inilabas dakong 3:00 ng madaling araw kahapon, umabot sa 47 ang kabuuang bilang ng mga biktima.
Sa bilang na ito, 26 indibiduwal ang matagumpay na nailigtas, habang 17 katao ang patuloy na nawawala.
Sa 26 nasagip, 24 ay mga nagtatrabaho sa gumuhong gusali at dalawa ang nakuha mula sa katabing apartelle na nabagsakan ng debris habang 10 ang sugatan na nasa pagamutan.
Ang bilang ng mga nasawi ay tumaas sa apat matapos maiangat ng mga emergency responder ang isang lalaki mula sa mga debris pagkalipas ng hatinggabi.
Nagpapatuloy ang search and rescue operations nang mahigit 24 oras kasunod nang biglaang pagguho ng estruktura dakong 2:00 ng madaling araw noong Linggo.
Nananatili ang mga disaster response team sa lugar at nagtatrabaho upang mahanap at ligtas na mailabas ang mga natitirang nawawalang indibiduwal mula sa kalumpunan ng mga debris.
Samantala, sinabi ng Philippine National Police na patuloy ang pakikipag-ugnayan nila sa mga lokal na awtoridad at mga emergency response unit upang tumulong sa construction site at mga katabing establisimiyento na naapektohan ng pagguho ng gusali.
Nagpapatuloy pa rin ang mga operasyon sa pagsagip sa gitna ng mapanganib na kondisyon dulot ng mga hindi matatag na debris at mga buhay na linya ng koryente.
