HATAW! D'yaryo ng Bayan hatawtabloid.com
NAGPAHAYAG ang Philippine National Police (PNP) na tumutulong ang ahensiya sa imbestigasyon kaugnay sa gumuhong gusali sa lungsod ng Angeles, Pampanga.
Ayon kay PNP chief P/Gen. Jose Melencio Nartatez, Jr., “Sinusuportahan din ng PNP ang patuloy na imbestigasyon upang matukoy ang sanhi ng insidente at mga posibleng paglabag sa kaligtasan at mga regulasyon sa konstruksiyon.”
Dagdag niya, “Nagpapatuloy ang mga operasyon sa pagsagip sa gitna ng mga mapanganib na kondisyon na dulot ng mga hindi matatag na debris at mga buhay na linya ng koryente.”
Agad nagpadala ang PRO 3 sa pamumuno ni P/BGen. Jess Mendez ng 175 tauhan ng pulisya upang makipagtulungan sa Bureau of Fire Protection (BFP), Armed Forces of the Philippines (AFP), at sa Angeles City Disaster Risk Reduction and Management Office sa mga operasyon sa paghahanap at pagkuha, pamamahala ng trapiko, at seguridad sa lugar.
Kasabay nito, pinayohan ng PNP ang publiko na iwasan ang lugar upang walang maging hadlang sa isinasagawang emergency operation.
Sinabi ng public information officer ng lungsod na si Jay Pelayo na magsasagawa sila ng magdamag na search and rescue operations para sa 17 indibiduwal na pinaniniwalaang nakulong sa ilalim ng mga guho ng gumuhong gusali.
Karamihan sa mga nakulong na biktima ay pinaniniwalaang mga construction worker.
Sa huling ulat, apat na ang namatay sa pagguho habang 26 sa 47 biktima ang nailigtas at 17 ang nananatiling nawawala. (MICKA BAUTISTA)
