HATAW! D'yaryo ng Bayan hatawtabloid.com
ni TEDDY BRUL
LAKAS-PAGGAWA ang puhunan ng mga construction worker kaya tungkulin ng pamahalaan na mahigpit na ipatupad ang mga pamantayan sa kaligtasan sa lahat ng pagawaan, pahayag ng Association of Women’s Workers in Construction Industry (AWWCI).
Mariing kinondena ng AWWCI ang sana’y naiwasang pagkamatay at pagkasugat ng mga manggagawa kung hindi dahil sa kapabayaan at pagtitipid ng kompanya sa itinatayong siyam na palapag na gusaling gumuho sa Balibago, Angeles City, Pampanga.
Panawagan ng grupo, papanagutin ang Golden Years Construction and Steelworks Corp., at mga kaukulang ahensiya ng gobyerno dahil sa kabiguang tiyakin ang mahigpit na pagpapatupad ng labor safety measures at regular na inspeksiyon sa lugar-paggawa.
Kinuwestiyon ng AWWCI kung bakit nagpatuloy ang konstruksiyon ng gusali kahit mayroon nang work stoppage order na inilabas noong Setyembre 2025 ang Department of Labor and Employment (DOLE) Central Luzon.
Ayon sa DOLE, ilang paglabag sa workplace safety regulations ang ginawa ng Golden Years Construction and Steelworks Corp., na naging dahilan ng pagpapahinto noon sa proyekto.
Natuklasan noon ng safety inspection team ng DOLE ang kakulangan o halos kawalan ng safety belt, lifeline, personal protective equipment, at hard hat sa construction site sa Barangay Balibago. Masahol pa, wala umanong nakatalagang safety officer sa lugar.
Inihayag ni DOLE Central Luzon Director Geraldine Panlilio na maging ang mga benepisyong tulad ng SSS, PhilHealth, at Pag-IBIG ay hindi umano naibibigay sa mga manggagawa.
Ayon kay Panlilio, inalis ang work stoppage order matapos umanong magsagawa ng mga pagbabago ang kompanya makalipas ang halos isang buwan.
Gayunman, nananatiling palaisipan kung bakit tila walang masusing follow-up safety inspection noong mga buwan ng Marso at Abril.
Sinabi rin ng DOLE na handa silang magbigay ng emergency employment at livelihood assistance sa mga apektadong manggagawa at kanilang pamilya.
Ngunit para sa AWWCI, walang ayudang makapapantay sa buhay ng obrerong nasawi dahil sa kasakiman ng kompanya at kapabayaan ng estado.
“Ayuda’y walang saysay sa obrerong itinanghal na bangkay bunsod ng kasakiman ng kompanya at kapabayaan ng estado,” pahayag ng AWWCI.
Iginiit ni Jane Vargas, national coordinating officer ng AWWCI, obligasyon ng mga safety inspector ng DOLE na tiyaking tuloy-tuloy ang pagpapatupad ng mga pangunahing pamantayan sa occupational safety at structural safety sa mga construction project.
Binigyang-diin niya na dapat tiyakin ng mga construction firm ang sapat na personal protective equipment at mahigpit na pagsunod sa structural shoring — kabilang ang temporary support systems, excavation safeguards, trenching standards, at mga hoist mechanism — upang maiwasan ang pagguho at maprotektahan ang mga manggagawa at komunidad.
Dagdag ni Vargas, dapat estriktong ipinapatupad ang mga hakbang pangkaligtasan bago at habang ginagawa ang proyekto, kabilang ang pagsusuri sa lupa, wastong paggamit ng PPE, at malinaw na safety signage.
Giit ng AWWCI, hindi dapat isinasantabi ang mga protocol laban sa pagguho, limitasyon sa bigat, at kapasidad ng mga kagamitan. Hindi dapat ipinipilit o ino-overload ang mga estruktura at kagamitang gaya ng gondola kung lampas na ito sa ligtas na kapasidad.
Pinaalalahanan din ng grupo ang mga kompanya na tiyaking ligtas ang mga daanan, rampa, hagdanan, at iba pang bahagi ng construction site upang maiwasan ang kapinsalaan at pagkamatay ng mga obrero.
