ARESTADO ang dalawang lalaking magkapatid at kanilang kasabwat na hinihinalang sangkot sa pagbebenta ng ilegal na droga sa loob ng pinaniniwalaang drug den kasunod ng ikinasang buybust operation sa Brgy. Dau, lungsod ng Mabalacat, lalawian ng Pampanga, nitong Martes, 8 Abril.
Kinilala ang magkapatid suspek na sina alyas Jess, 37 anyos; alyas Ren, 36 anyos; at kanilang kasabwat na si Tin-Tin, 25 anyos.
Narekober ng mga awtoridad ang kabuuang tatlong pirasong transparent plastic sachet ng pitong gramo ng hinihinalang shabu na tinatayang nagkakahalaga ng P47,600; iba’t ibang drug paraphernalia; isang smart phone; at buybust money.
Isinagawa ang operasyon ng pinagsamang elemento ng PDEA RO 3 Special Enforcement Team (RSET), PDEA Pampanga Provincial Office at Pampanga PPO-Drug Enforcement Unit.
Pansamantalang nakapiit ang mga naarestong suspek sa PDEA RO3 Jail Facility at nakatakdang kasuhan ng paglabag sa RA 9165 o Comprehensive Dangerous Drugs Act of 2002. (MICKA BAUTISTA)
