HATAW! D'yaryo ng Bayan hatawtabloid.com
HINDI umabot nang buhay sa ospital ang isang lalaking sakay ng motorsiklo matapos siyang harangin at pagsasaksakin ng mga nakaalitan sa kalsada sa bayan ng Sta. Rosa, lalawigan ng Nueva Ecija.
Sa ulat mula sa Sta. Rosa MPS, kinilala ang biktimang si Darius Nepomuceno, 24 anyos, agad binawian ng buhay dahil sa mga tama ng saksak sa kaniyang katawan.
Ayon sa kaanak ng biktima, sakay ng motorsiklo si Nepomuceno para maghatid ng kaibigan nang harangin sila ng dalawang suspek na nakasakay sa isang tricycle sa Brgy. La Fuerte.
Lumilitaw na bago ang krimen ay may nakatinginan nang masama sa daan ang biktima na maaaring ikinagalit ng isa sa mga suspek kaya sila inabangan.
Sa pag-iimbestiga ni P/Cpl. Jerry Oria ng Sta. Rosa MPS, nabatid na parehong nakainom ang grupo ng biktima at grupo ng suspek na sinabing siga-siga sa daan hanggang nagkayabangan.
Pagbalik ng grupo ng biktima, inabangan sila ng grupo ng mga suspek at doon nangyari ang pananaksak na ikinamatay ni Nepomuceno at ikinasugat ng isa niyang kasama.
Agad naaresto ang isa sa mga suspek habang hinahanap ang isa pang tumakas na kasama. (MICKA BAUTISTA)
