NABULABOG ang mga residente nang marinig ang sunod-sunod na putok ng baril sa isang gasolinahan sa Brgy. Sto Niño, bayan ng Guagua, lalawigan ng Pampanga, nitong Lunes ng gabi, 17 Enero 2022.
Tumambad sa mga residente ang duguan at wala nang buhay na katawan ng lalaki habang mabilis na lumakad paalis sa lugar ang hindi kilalang suspek.
Sa ulat mula sa Guagua Municipal Police Station, kinilala ang biktima ng pamamaril na si Barangay Sto. Niño Chairman Ranier Asban, 45 anyos.
Sa inisyal na imbestigasyon bago ang insidente, nakatayo ang biktima sa ECHO Gas station sa nasabing barangay at gumagamit ng cellphone nang pagbabarilin ng naglalakad na suspek saka tumakas patungong Feeder Road, Brgy. Sto. Cristo, sa nabanggit na bayan.
Kasunod nito, nagsagawa ng dragnet operation ang pulisya at ipina-flash alarm para sa posibleng pagdakip sa suspek na nakasuot ng itim na kamiseta, short pants, at surgical facemask.
Kinondena ni Guagua Mayor Dante Torres ang nangyaring pagpatay at nakikipagtulungan na sa pulisya para sa mabilis na pagresolba sa kaso. (MICKA BAUTISTA)
