Enrile babalik bilang Senate minority leader

KINOMPIRMA ni Senate President Franklin Dirlon na babalik bilang minority leader si Sen. Juan Ponce Enrile sa oras na bumalik sa kanyang trabaho sa Senado makaraan payagan ng Korte Suprema na makapagpiyansa sa kanyang kasong plunder sa Sandiganbayan.

Ayon kay Drilon, naging acting minority leader lamang si Sen. Tito Sotto nang makulong si Enrile kaya’t babalik siya bilang minority leader.

“Tama po iyan, dahil si Senator Sotto ay “acting” Minority Leader lamang, kaya pagbalik ni Senator Enrile babalik po siya sa kanyang posisyon bilang Minority Leader,” wika pa ni Drilon.

Aminado si Drilon na malaki ang maitutulong ni  Enrile sa paghimay ng Bangsamoro Basic Law (BBL).

Malawak aniya ang kaalaman ni Enrile sa paghimay sa mga panukalang batas lalo na sa magiging legalidad ng BBL.

“Given the fact na malawak na ang karanasan ni Senator Enrile sa pamahalaan, makakatulong po siya sa pagtingin sa mga importanteng panukalang batas, yung sinabi mo nga na Bangsamoro Basic Law,” ani Drilon.

Una nang sinabi ni Drilon na kailangan nilang matiyak na alinsunod sa Saligang Batas ang BBL upang hindi ito magkaproblema sa Korte Suprema sa oras na maisabatas.

Samantala, sa impormasyong nakalap ni Drilon, sa Lunes magre-report si Enrile sa Senado.

Cynthia Martin