2 sundalo patay sa enkwentro sa ComVal

DAVAO CITY – Patay ang dalawang sundalo sa enkwentro sa Sitio Kalinugan, Brgy. Casoon, Monkayo, Compostela Valley Province kamakalawa.

Kinilala ang mga biktimang sina Corporal Byron Moreno at Private First Class Thon Katog, parehong miyembro ng 25th Infantry Battalion.

Nakasagupa ng mga biktima ang 60 miyembro ng Section Committee 3 Pulang Bagani Command 4 Southern Mindanao Regional Committee ng New People’s Army (NPA) na pinangungunahan ni Zaldy Cañete, alyas Jinggoy.

Bukod sa napatay, isang sundalo rin ang sugatan na kinilalang si PFC Castillanes, nagpapagaling na sa Davao Regional Hospital sa Tagum City.

Kabilang ang mga biktima sa mga nagsagawa ng operasyon para iligtas ang dalawang sundalo na binihag ng mga rebelde noong Setyembre 30.

Makaraan ang bakbakan, narekober sa encounter site ang improvised explosive device, electrical wires at mga gamit ng NPA.

Nagpapatuloy ang pursuit operation ng militar laban sa tumakas na mga rebeldeng grupo.