PASIG CITY — Mahigpit na pinigilan ng United States ang opensa ng Czechia upang itala ang kumbinsidong 25-17, 25-12, 25-16 panalo nitong Huwebes sa Women’s Volleyball Nations League (VNL) sa PhilSports Arena.
Pinangunahan ni Chiaka Ogbogu ang matibay na depensa ng USA matapos makapag-ambag ng anim sa kabuuang 12 blocks ng koponan. Dahil dito, naitala ng USA ang ikalima nitong panalo sa anim na laro at nanatiling nasa magandang posisyon para makapasok sa Finals ng pangunahing taunang internasyonal na torneo ng FIVB.
Muling nanguna sa opensa ng USA si Jordan Thompson matapos kumamada ng 15 puntos mula sa 14 attacks at isang block, habang nagdagdag sina Ogbogu at Logan Eggleston ng tig-11 puntos.
Hindi pa nawawalan ng kahit isang set ang USA sa dalawang laban nito sa Pasig City leg ng VNL na inihahandog ng Philippine Sports Commission.
Dahil sa matinding depensa sa net, nagkaroon ng malaking kalamangan ang USA sa attacks laban sa Czechia, 40-27.
Walang manlalaro ng Czechia ang umabot sa double figures. Nanguna si Magdalena Jehlarova na may siyam na puntos, habang may tig-pitong puntos sina Ela Koulisiani at Monika Brancuska.
Ito na ang ikatlong pagkatalo ng Czechia sa anim na laban at ikalawang sunod na kabiguan sa Pasig City leg.
Susubukan nilang makabangon sa laban kontra sa paborito ng mga Pilipinong tagahanga na Japan ngayong Biyernes.
Magkakaroon naman ng pahinga ang USA sa Biyernes bago harapin ang world No. 1 at defending champion na Italy sa Sabado. (AVC/HNT)
