PASIG CITY — Nagpakita ng mahusay at organisadong laro ang binagong koponan ng Estados Unidos upang simulan ang kanilang kampanya sa Pasig City leg ng Volleyball Nations League (VNL), matapos dominahin ang Dominican Republic, 25-20, 25-19, 25-12, nitong Miyerkules sa PhilSports Arena.
Sa mahusay na pagdidikta ng takbo ng laro ni team captain at setter na si Jordyn Poulter, naging epektibo ang opensiba ng mga Amerikano at nagtala ng malaking bentahe sa attack points, 43-31, sa pagbubukas ng VNL Week 2 na inihahatid ng Philippine Sports Commission (PSC).
Pinangunahan ni Jordan Thompson ang opensiba ng USA matapos umukit ng 13 attack points at dalawang service aces. Si Thompson ay isa sa mga manlalarong nanatili mula sa roster ng Estados Unidos noong unang linggo ng torneo.
Dahil sa malalakas na serbisyo ng USA—na minsang umabot sa higit 91 kilometro bawat oras—nahirapan ang Dominican Republic na makapagbuo ng maayos na opensiba.
Nag-ambag naman si Logan Eggleston ng 10 puntos mula sa mga atake, habang nagtala si Dana Rettke ng limang attack points at limang blocks upang tulungan ang Estados Unidos na itaas sa 4-1 ang kanilang win-loss record.
Bagama’t tig-dalawang aces lamang ang naitala ng magkabilang koponan at may kalamangan ang Dominican Republic sa reception (69-46) at sets (104-94), nanatiling kontrolado ng USA ang kabuuan ng laban.
Ayon kay Thompson, hindi man naging perpekto ang kanilang laro, ikinatuwa niya ang mabilis na pag-aangkop ng kanyang mga kakampi sa bagong lineup.
“Sa ensayo at paghahanda, sinisikap naming magkaroon ng magandang samahan bilang grupo dahil bago ang roster na ito,” ani Thompson.
“Hindi man laging maganda ang naging takbo ng laro, mahusay kaming humanap ng paraan upang malampasan ang mga pagsubok kahit hindi eksakto sa gusto naming paraan,” dagdag niya.
Pinangunahan ni beteranang outside hitter Yokaira Paola Pena Ysabel ang Dominican Republic sa naitalang walong puntos mula sa pitong attacks, habang nagdagdag si batang opposite hitter Alondra Denis Tapia Cruz ng limang puntos, lahat mula sa mga atake.
Tinanggap ng Dominican Republic ang kanilang ikalimang sunod na kabiguan sa parehong bilang ng mga laro.
Tinapos ng Estados Unidos ang laban sa kumbinsidong paraan upang makuha ang ikaapat nitong panalo sa limang laro, habang nanatiling walang panalo ang Dominican Republic matapos ang limang sunod na pagkatalo sa VNL. (AVC/HNT)
