24 Pinoy 9 buwan kulong sa Russia nakauwi na sa bansa

LIGTAS na nakauwi sa Filipinas ang 24 migranteng manggagawa na halos siyam na buwan nakulong sa Russia pagkatapos mag-usap sina Pangulong Ferdinand Marcos, Jr. at Russian President Vladimir Putin.

Bagamat iimbestigahan pa lamang, itinuturing na overseas Filipino workers (OFWs) ang mga dumating sa Maynila at malugod na sinalubong sa Ninoy Aquino International Airport (NAIA) Terminal 1 nina Department of Foreign Affairs (DFA) Secretary Ma. Theresa Lazaro at iba pang mga tauhan ng DFA.

Nabatid na mula sa Krasnoyarsk, Russia, ang mga Pinoy ay bumiyahe sa Bangkok, Thailand, bago muling bumiyahe pauwi ng Filipinas.

Ayon sa Department of Migrant Workers (DMW), nagtrabaho ang mga naturang Pinoy bilang tagalinis sa Russia ngunit ikinulong dahil sa kakulangan ng mga kinakailangang dokumento.

Tiniyak ng DMW na iimbestigahan nila ang pangyayari upang maiklaro kung biktima sila ng human trafficking at matukoy ang kanilang ‘illegal recruiters’.