HATAW! D'yaryo ng Bayan hatawtabloid.com
ISANG matinding hanay ng mga kampeon at medalists ang magtatagisan sa Philippine leg ng Women’s Volleyball Nations League (VNL) na magsisimula ngayong Miyerkules sa Philsports Arena sa Pasig.
Pinangungunahan ng world No. 1 at kasalukuyang kampeon ng VNL na Italy ang mga kalahok sa pagbabalik sa bansa ng pangunahing taunang internasyonal na torneo ng volleyball na inorganisa ng pandaigdigang namamahalang katawan ng isport na FIVB.
Dumating naman ang Japan, silver medalist ng VNL noong 2024, sa Philippine leg na may dalang matinding kumpiyansa matapos ang malinis na 4-0 panalo-talong rekord. Hawak naman ng Italy, tatlong beses na kampeong USA at world No. 13 Czechia ang markang 3-1.
Pinamumunuan nina team captain Mayu Ishikawa, Yoshino Sato at Yukiko Wada, tinalo ng Japan ang France, Ukraine, Germany at Canada.
Sa pangunguna nina Ekaterina Antropova, Merit Adigwe at Loveth Omoruyi, mabilis na dinaig ng Italy ang Bulgaria, Netherlands at Türkiye bago naputol ang kanilang ratsada sa kamay ng Brazil.
May isang panalo lamang ang world No. 9 Serbia sa apat na laban, habang naghahanap pa rin ng unang tagumpay ang ika-12 ranggong Dominican Republic sa torneo.
Magtatagpo ang world No. 7 USA at Dominican Republic sa alas-12 ng tanghali ngayong Miyerkules, bago magsagupa ang Czechia at Italy sa alas-4 ng hapon. Maghaharap naman ang Japan at Serbia sa alas-8 ng gabi.
Bawat koponan ay maglalaro ng 12 laban sa group stage, kung saan ang nangungunang walong koponan ay uusad sa finals na gaganapin sa Macau.
Ang Philippine leg ay tampok ang Pool 5 sa ikalawang linggo ng kompetisyon. Kabilang din sa mga host ng pool play ng prestihiyosong torneo ang Canada, Brazil, China, Türkiye, Thailand, Serbia, Hong Kong at Japan.
Tatlong bansa mula sa Asya ang kalahok sa 18-nation field. Papasok ang world No. 6 China sa Week 2 na may 3-1 rekord, habang patuloy na naghahanap ng unang panalo ang world No. 24 Thailand matapos ang apat na laban.
Muling masasaksihan ng mga Pilipinong tagahanga nang live ang Women’s VNL sa unang pagkakataon matapos ang apat na taon, habang huling nag-host ang bansa ng men’s VNL matches dalawang taon na ang nakalilipas. (AVC/HNT)
