DQ case vs Sen. Poe naisampa na

TULUYAN nang naisampa ang kasong kumukwestiyon sa legalidad ng pagiging mambabatas ni Senador Grace Poe, nitong Huwebes.

Naisampa ng complainant na si Rizalito David ang reklamo sa Senate Electoral Tribunal (SET) makaraan maudlot kamakalawa nang hindi makapagdala ng P50,000 filing fee at P10,000 deposit. 

Layon ng 16-pahinang quo warranto complaint ni David na patalsikin si Poe dahil sa kuwestiyon sa kanyang citizenship.

Iginiit ng reklamo na palsipikado ang mga dokumento ng senador at hindi rin totoo ang mga nakalagay sa Certificate of Candidacy niya nang tumakbo sa 2013 elections. 

Dagdag ni David, may problema sa pagiging foundling ni Poe, na dapat sana ay nalinaw bago tumakbo bilang senador. 

Binanggit ng complainant na nagpakilalang concerned citizen, walang grupo o sino mang nasa likod niya sa pagsasampa ng reklamo. Sariling gastos din niya ang inilaan para sa kaso. 

Samantala, inihayag ni Poe na bukod sa handa niyang sagutin ang kuwestiyon sa kanyang citizenship ay ipinagpapasalamat din niya ito. 

“Sa isang banda, mabuti na rin at ako ay nagpapasalamat na mayroon nang naghain ng kuwestiyon tungkol sa isyung ito para masagot ko ito nang kompleto, maihayag ang katotohanan at matuldukan na ang pagdududa,” sabi ng senador. 

“Ako po ay Filipino at residente ng Republika ng Filipinas.”

Kasabay nito, nagpasalamat din si Poe sa mahigit 20 milyong botanteng pumabor sa kanya noong nakaraang halalan. 

Dagdag niya, “Ako ay tapat sa ating mga kababayan at nagsasabi ng katotohanan. Sila ang dahilan kung bakit ako naririto sa Senado kaya marapat lamang na ipaglaban at ipagtanggol ko ang kanilang naging desisyon.” 

Habang naniniwala ang batikang election lawyer na si Romy Macalintal na mahina ang kaso laban kay Poe at hindi na ito dapat pang tanggapin ng SET.