HATAW! D'yaryo ng Bayan hatawtabloid.com
DALAWANG dayuhan na itinuturing na high-value individuals (HVIs) ang naaresto sa ikinasang anti-illegal drug operation ng Angeles City Police Office (ACPO) katuwang ang Regional Intelligence Unit 3 (RIU3) ng Police Regional Office 3 (PRO3) sa Arayat Boulevard, Barangay Pampang, Angeles City kamakalawa ng gabi.
Kinilala ang mga suspek na sina alyas Zhou, 28 anyos, Chinese national, at alyas Kim, 38 anyos, Korean national, kapwa naninirahan sa isang apartment sa Barangay Margot, Angeles City.
Nasamsam mula sa mga suspek ang dalawang sachet ng hinihinalang shabu na tinatayang may timbang na limang gramo at may standard drug price na P34,000.
Nakatakas ang target ng operasyon na si alyas Boss, kabilang sa listahan ng mga target personalities ng pulisya sa patuloy ang isinasagawang follow-up operation upang siya ay maaresto.
Ayon kay P/Brigadier General Jean S. Fajardo, Regional Director ng PRO3, ang pagkakaaresto sa dalawang dayuhang HVI ay nagpapakita ng pinaigting na kampanya ng pulisya laban sa ilegal na droga sa rehiyon.
Ayon sa opisyal, ang tagumpay na ito ay patunay ng masigasig at walang humpay na pagtatrabaho ng mga operatiba na hindi mag-aatubiling tugisin at papanagutin ang mga sangkot sa ilegal na droga—lokal man o banyaga.
Ang mga naarestong suspek at nakompiskang ebidensiya ay dinala na sa Angeles City Drug Enforcement Unit (ACDEU) para sa dokumentasyon at kaukulang disposisyon.
Sila ay nahaharap sa kasong paglabag sa Sections 5 at 11, kaugnay ng Section 26, Article II ng Republic Act 9165 o ang Comprehensive Dangerous Drugs Act of 2002. (MICKA BAUTISTA)
