KOMPIRMADONG 20 katao na ang namatay nang pito pang bangkay ang narekober sa gumuhong 9-palapag na gusali sa Barangay Balibago, Angeles City, Pampanga sa patuloy na search and retrieval operations nitong Lunes ng gabi hanggang nitong Martes.
Sa report ng Bureau of Fire Protection (BFP) Central Luzon at ng Angeles City Public Information Office (PIO), ang ika-14 bangkay ay nakuha ng search and retrieval team dakong 11:20 ng gabi noong Lunes.
Samantala, magkakasunod na nakuha ang ika-15 at ika-16 biktima dakong 1:56 at 2:05 ng madaling araw kahapon, Martes, 2 Hunyo.
Ang ika-17 bangkay ay narekober bandang 4:08 ng madaling araw habang hapon ng Martes nang mahugot ang bangkay ng isang batang babae, isang lalaki, at isa pang babae.
Karamihan sa mga biktima ay mga trabahador sa konstruksiyon na natutulog sa ikalawang palapag ng itinatayong gusali nang mangyari ang trahedya.
Nakuha rin ang isang patay na aso na nadaganan ng mga nagkadurug-durog na bato.
