2 tulak sa Nueva Ecija todas sa buy bust ops (Pumalag, nanlaban)

TUMIMBUWANG ang dalawang hinihinalang tulak ng ilegal na droga nang makipagbarilan sa pulisya sa ikinasang drug buy bust operation sa Brgy. San Roque, sa lungsod ng Gapan, lalawigan ng Nueva Ecija, nitong Martes, 12 Oktubre.

Sa ulat mula kay P/Lt. Col. Alexie Desamito, hepe ng Gapan City Police Station (CPS), kinilala ang dalawang napaslang na suspek na sina Randy Boy Acquiat, 33 anyos; at Jonathan Tipano, 33 anyos.

Sa imbestigasyon ng mga awtoridad, nagsagawa ng buy bust operation ang Drug Enforcement Team ng Gapan CPS sa pakikipag-ugnayan sa Philippine Drug Enforcement Agency (PDEA), laban sa dalawang suspek sa nabanggit na lugar kamakalawa.

Ayon kay Desamito, nang makabili ang isang poseur buyer ng ilegal na droga at akmang aarestohin, pero pumalag at nanlaban ang dalawa saka pinaputukan ang mga operatiba.

Ngunit sumablay ang dalawang suspek hanggang makaganti ng putok ang mga awtoridad na dahilan ng kanilang agarang kamatayan.

Nakuha sa pinangyarihan ng krimen ang 15 plastic sachets ng hinihinalang shabu, aabot sa 75 gramo ang timbang, at tinatayang nagkakahalaga ng P500,000; isang kalibre .45 pistol; at isang kalibre .38 rebolber mula sa mga suspek.

Nagpapatuloy ang imbestistigasyon ng pulisya upang tukuyin ang mga kasabwat ng mga naitumbang suspek. (MICKA BAUTISTA)