This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
NAKALIGTAS sa tiyak na kapahamakan ang pamilya ng ABS CBN broadcaster na si David Oro nang mataranta ang riding in tandem na nagtangkang holdapin ang pamilya sa Quezon City, iniulat ng pulisya kahapon.
Kaugnay nito, agad nagpalabas ng kautusan si Quezon City Police District (QCPD) Director, Chief Supt. Edgardo G. Tinio, sa kanyang 12 station commander na paigtingin ang police visibility sa kanilang ‘area of responsibility’ sa loob ng 24 oras.
Ayon kay David Oro, dakong 11 p.m. kamakalawa, kararating lamang nila sa kanilang bahay sa Paraiso St., Brgy. San Francisco Del Monte, Quezon City.
Pagdating sa bahay, naunang bumaba sa minamanehong Starex ni David ang kanyang mag-ina.
Habang ipinapasok ni David ang sasakyan sa gate, dumating ang dalawang lalaking sakay ng motorsiklo. Bumaba ang isa at pilit na inaagaw ang shoulder bag ng asawa ni David.
Nang manlaban at tumangging ibigay, pinaputukan ng suspek ang babae ngunit masuwerteng hindi tinamaan.
Ngunit mabilis na tumakas ang mga salaring nang makitang bumaba na si David para saklolohan ang asawa.
Samantalang, iniuutos ni Tinio sa Masambong Police Station 2 na agad magsagawa ng imbestigasyon at alamin ang grupo ng mga salarin para agad maaresto.
