Sekyu tiklo sa pagnanakaw sa among Chinese

NAGA CITY – Arestado ang isang security guard makaraan pagnakawan ang kanyang amo na isang Chinese national sa Brgy. Balubad, Atimonan, Quezon kamakalawa.

Kinilala ang suspek na si Gilbert Devilles, 26-anyos.

Nabatid na inilapag ng biktimang si Cao Wei, 32-anyos, project manager ng CWE Construction Company, ang bag niya na may lamang perang aabot sa P50,000.

Ngunit makaraan ang ilang minuto, napansin niyang nawala sa kinalalagyan ang nasabing bag.

Makaraan suriin ang CCTV camera na nakakabit sa opisina, nakita rito si Devilles na pumasok at kinuha ang bag.

Agad humingi ng tulong si Wei sa mga awtoridad na naging daan nang pagkakahuli sa suspek.