HATAW! D'yaryo ng Bayan hatawtabloid.com
NAGPAHAYAG ng suporta si Senador Alan Peter Cayetano sa panukalang batas na naglalayong palakasin ang paninindigan ng Filipinas laban sa mga chemical weapon.
Bilang miyembro ng Senate Committee on National Defense and Security, Peace, Unification and Reconciliation, pinirmahan ni Cayetano kasama ang iba pang Committee Report No. 344 para sa Senate Bill No. 2871.
Ito ang Act “Prohibiting the Development, Production, Stockpiling, and Use of Chemical Weapons, Providing for Their Destruction, Imposing Penalties for Violations, and Appropriating Funds Therefor.”
Tugon ng Filipinas, ang panukalang ito sa mga obligasyon ng bansa sa Chemical Weapons Convention (CWC), ay tumututok sa pagwasak at pagbabawal ng mga chemical weapon sa buong mundo.
Sa ilalim ng panukalang batas, ang Anti-Terrorism Council (ATC) ang itatalaga bilang Philippine National Authority sa Chemical Weapons Convention (PNA-CWC).
Sila ang magiging pangunahing ahensiya para sa pakikipag-ugnayan sa Organization for the Prohibition of Chemical Weapons (OPCW) at sa iba pang mga kasaping bansa upang matupad ang mga tungkulin ng Filipinas sa kasunduan.
Ipinagbabawal ng panukala ang paggawa, pagtitipon, pagkuha, paglipat, at paggamit ng chemical weapons.
Sakop din nito ang pagbabawal ng paghahanda para sa mga military operations na gumagamit ng chemical weapons, pagtulong o paghikayat sa mga gawain na ipinagbabawal ng kasunduan, at pag-export o pag-import ng mga Schedule 1 chemicals mula sa mga bansang hindi kasapi sa kasunduan.
Kasama rin sa ipinagbabawal ang paggamit ng riot control agents bilang sandata sa digmaan.
Matagal nang tumitindig si Cayetano laban sa “weapons of mass destruction.” Noong 2017, bilang kalihim ng Department of Foreign Affairs, nilagdaan niya ang kasunduan laban sa nuclear weapons sa 72nd United Nations General Assembly sa New York.
“The world will only be safe if we eliminate all weapons of mass destruction,” ani Cayetano sa nasabing pagtitipon. (NINO ACLAN)
