HATAW! D'yaryo ng Bayan hatawtabloid.com
NAIS ng mahigit 30 grupo ng commuters at transport workers na ihatid sina Vice President Leni Robredo at Senador Kiko Pangilinan sa Malacañang.
Kabilang rito ang commuters pati ang mga nagmamaneho ng pampublikong sasakyan gaya ng jeepney, tricycle, bus, at iba pang manggagawa sa sektor ng transportasyon.
Sa isang pahayag, sinabi nilang ang tambalang Leni-Kiko ang magbibigay sa mga Filipino ng makataong sistema ng transportasyon.
Sa sistemang ito ng Leni-Kiko tandem, sinabi nilang hindi maiiwasan ang 95 porsiyentong ordinaryong Filipino na walang pribadong sasakyan.
Tiwala sila, sa pamumuno nina Leni at Kiko, mayroong boses ang mga manggagawa sa sektor ng transportasyon at commuters, sa mga desisyon tungo sa biyahe para sa pagbabago.
“Ito ang totoong unity: pagkakaisa na hindi politiko ang sentro kundi ordinaryong mga mamamayan,” pahayag ng grupo.
Kabilang sa mga grupong sumusuporta sa Leni-Kiko tandem ang Piston, Commuters for Leni & Kiko, Sentro, Move Metro Manila, Life Cycles, Akbayan Youth, Komyut, BIODMPC, Propel, National Confederation of Transportworkers’ Union at AltMobility PH. (NIÑO ACLAN)
