Tallano gold, Yamashita treasure itinanggi ni Imee

URBAN legend!

Ganito tinawag ni Sen. Imee Marcos ang mga kuwento tungkol sa pagkakaroon ng kanilang pamilya ng tone-toneladang ginto, mula sa Yamashita treasure o Tallano gold.

“I think it’s fun to think of all the gold, and it continues to be urban legend,” wika ni Imee noon sa isang interview sa telebisyon.

Ayon kay Marcos, wala siyang nakikita ni isang piraso ng ginto kahit madalas pa itong pag-usapan ng mga tao.

“I’ve heard about it being talked about constantly pero wala namang nakikita, wala naman kaming napapakinabangan, wala namang nabenta,” giit ni Imee.

Nagtataka rin si Imee kung bakit palaging idinidikit ang kanyang pamilya sa Yamashita treasure at Tallano gold.

Ngunit mismong mga tagasuporta ng kanyang kapatid na si Ferdinand “Bongbong” Marcos, Jr., ang nagbibida sa social media na ipamimigay nito ang Tallano gold kapag nanalo bilang pangulo sa 2022.

Kamakailan lang, maraming residente ng Quezon City, Caloocan, at Pangasinan ang pumalag dahil nabudol sila sa Tallano gold.

Ayon sa mga nabudol, lumapit sa kanila ang mga nagpakilalang tao ni Bongbong at pinangakuan sila na bibigyan ng Tallano gold kapalit ng pagsuporta sa kandidatura ng anak ng yumaong diktador. (NIÑO ACLAN)