Steelman nangisay sa koryente, 1 pa kritikal

PATAY ang isang 21-anyos steelman habang ginagamot ang kanyang kasama nang madikit ang hawak nilang steel bar sa linya ng koryente sa ginagawang gusali sa Ermita, Maynila kahapon ng umaga.

Hindi na umabot nang buhay sa Ospital ng Maynila si Noel Sale, stay-in sa construction site sa 1863 Pilar Hidalgo Lim St., Ermita, Manila, habang ginagamot sa nasabi ring ospital si Adrian Pantua, 24, isa ring steelman, residente ng P. Paredes St., Sampaloc, Manila.

Sa report ni Det. Jorlan Taluban ng Manila Police District (MPD)-Homicide Division, dakong 10:30 a.m. nang naganap ang insidente sa construction site sa 1863 Pilar Hidalgo Lim St., Emita, Manila.

Habang nagtatrabaho ang mga biktima sa itaas na bahagi ng gusali nang madikit sa linya ng koryente ang hawak nilang steel bar.

Isinugod ang dalawa sa ospital ngunit idineklarang dead on arrival si Sale.

Inaalam pa kung may pananagutan sa insidente ang nagpapagawa ng nasabing gusali.