3 paslit todas sa karne ng pawikan

LEGAZPI CITY – Kasong multiple homicide ang kakaharapin ng isang fish vendor sa Irosin, Sorsogon, makaraang malason ang isang pamilyang bumili sa kanyang ibinentang karne ng pawikan.

Kasunod ito nang lumabas na resulta mula medico legal na isinagawa ng National Bureau of Investigation (NBI) hinggil sa tunay na sanhi ng pagkamatay ng mga biktimang sina Juvelyn Alon, isang taon at anim buwan gulang; Jacob Alon, 3, at Jose Bernardo Alon, 5, mula sa Brgy. Liang sa nasabing bayan.

Habang ang mga magulang nila na sina Pio Alon at Theresa Alon ay ilang araw na namalagi sa ospital bunsod din ng pagkalason.

Ayon kay Senior Insp. Romy Gellirena, inihahanda na ng mga awtoridad ang kasong isasampa laban kay Norman Gacias.

Pinaniniwalaang ang nasabing pawikan ay mula pa sa karagatang sakop ng Matnog, Sorsogon na katabi lamang ng nabanggit na barangay.