Biyenan pinatay, tinangkang gahasain ng manugang

NAGA CITY – Bagsak sa kulungan ang isang lalaki makaraang mapatay sa bugbog ang kanyang biyenan na tinangka niyang gahasain sa bayan ng Sagñay, Camarines Sur kamakalawa.

Kinilala ang suspek na si Fernando Amata, 40-anyos.

Ayon kay Senior Insp. Chester Pomar, hepe ng PNP-Sagñay, biglang pumasok ang suspek sa bahay ng biktimang si Salvacion Pante, 59-anyos.

Posibleng tinangkang gahasain ng suspek ang biktima kaya nanlaban.

Dahil dito, pinagsusuntok ng suspek sa dibdib ang biktima na naging dahilan ng agaran niyang kamatayan.

Sa imbestigasyon ng mga awtoridad, napag-alamang nakababa ang shorts ni Pante nang maabutan ng isa sa kanyang mga anak, at wala nang buhay.

Nasa impluwensiya ng alak ang suspek nang mangyari ang krimen.

Natukoy ang suspek dahil sa naiwang gamit sa loob ng bahay ng biktima.

Hindi na rin nagawang itanggi ng suspek ang krimen dahil may nakakita sa kanyang pambubugbog sa biktima.

Nasa kustodiya na ng mga awtoridad ang suspek na nakatakdang sampahan ng kasong murder.