Estudyante, residente nadenggoy sa LP event

KARAMIHAN ng mga mag-aaral ay pinuwersang dumalo sa “Gathering of Friends” ng Liberal Party na ginanap sa Coliseum nitong nakaraang Lunes (August 24), ulat ng radyo na nakabase sa probinsya.

Sa ulat ng DyLA Cebu, ang attendance ng mga estudyante ay tiningnan din sa event na dinaluhan ni Presidente Noynoy Aquino.

Ang mga hindi dumalo na estudyante, sila ay minarkahan ng “absent.”

Sinabi rin ng mga estudyante na hindi sila pinayagan umalis sa venue sa kabila ng kanilang pakiusap at dahilan na mayroon pa silang pagsusulit bandang 4:00pm, ayon sa radio report.

Sinabihan raw sila ng mga kagawad ng Presidential Security Group (PSG) na hindi puwedeng umalis dahil hindi pa tapos ang event.

Ayon sa DyLA, tumanggi ang mga miyembro ng PSG na buksan ang gate ng coliseum dahil “the President was still there.”

Ayon sa Criminology students mula sa isang university sa downtown, sinabihan silang ang event ay matatapos dakong 3:00 ng hapon.

Pero sa ganoong oras, sina  President Aquino at DILG Secretary Mar Roxas ay hindi pa nakapagtatalumpati.

Nakiusap ang mga mag-aaral sa PSG personnel na payagan na silang lumabas ng coliseum pero hindi sila pinakinggan ng PSG.

Isang nautical student ang nagtanong “dyLA, wa lagi panghatag sir?”

Sinabi ng mga estudyante na bibigyan sila ng goodies tulad ng t-shirts pero wala naman daw silang natanggap.

Marami rin senior civilians ang gusto nang umalis sa event, pero hindi sila pinayagan.

Ayon kay Salvacion Bueno, 74, mula sa Mambaling, siya at ang kanyang kasamahan ay gusto nang umuwi dahil gutom na. Wala naman raw kasing pagkain o snacks na ipinamigay.

“Kakuyapon nako sir kay gutom kaayo. Hangyua intawon sir nga makagawas mi,” aniya.

Dagdag ni Bueno, isang supporter ni Roxas, sinabihan sila ng isang barangay leader ng kanilang organisasyon na may ipamamahagi na snacks pero wala naman pala.

Sinabi pa sa ulat na isang babaeng miyembro ng PSG ang nagalit sa radio reporters ng  DyLA at itinulak palayo nang kapanayamin ng media ang mga nagrereklamong estudyante at mga residente.

HATAW News Team