‘Hiniram’ na anak niluray ng ama

NAGA CITY – Inireklamo ang isang padre de pamilya makaraan halayin ang sariling anak sa Lucena City.

Sa ipinadalang impormasyon ng Quezon Police Provincial Office, personal na dumulog sa opisina ng pulisya ang isang ina kasama ang 3-anyos anak para maghain ng reklamo sa dati niyang karelasyon.

Sa imbestigasyon ng mga awtoridad, napag-alaman na nagkaroon nang hindi pagkakaintindihan ang ina ng biktima at ang 25-anyos suspek tungkol sa kustodiya ng kanilang dalawang anak.

Dahil dito, nagdesisyon ng suspek na hiramin muna ang biktima at doon pinaliguan ang menor de edad.

Pagkatapos ay agad ipinaalam ng biktima sa kanyang ina ang nangyari nang paliguan siya ng ama.

Nabatid na ipinasok ng suspek sa pribadong bahagi ng katawan ng biktima ang kanyang daliri.

Nang mabatid ang nangyari, hindi nagdalawang isip ang ina ng biktima na ipahuli ang suspek.

Sa ngayon, nasa kostudiya na ng mga awtoridad ang suspek na nakatakda sampahan ng kasong rape.