HATAW! D'yaryo ng Bayan hatawtabloid.com
ARESTADO ang isang 39-anyos lalaki, kilala sa alyas na ‘Tulok’ na pinaniniwalaang talamak sa pagtutulak ng droga, sa isinagawang buy bust operation ng mga operatiba ng Station Drug Enforcement Unit (SDEU), noong Sabado ng gabi, 29 Agosto, sa lungsod ng Marikina.
Kinilala ni P/Col. Restituto Arcangel, hepe ng Marikina police, ang nadakip na suspek na si Rolando Turalba, Jr., alyas Tulok, 39 anyos, residente sa #36 CM Recto St., Barangay Parang, sa naturang lungsod.
Dakong 6:30 pm kamakalawa nang ikasa ng mga tauhan ni P/Capt. Fernildo de Castro, hepe ng Station Drug Enforcement Unit (SDEU) ang buy bust operation sa Ephesians St., Barangay Concepcion-Uno, laban sa suspek.
Nagpanggap na buyer si P/Lt. Antonio Balois, Jr., gamit ang buy bust money at nakipagkasundo sa suspek na kaniya umanong bibilhan ng shabu.
Matapos ang palitan ng droga, inaresto ng mga operatiba ang suspek at nakuha mula sa kaniya ang siyam na maliliit at apat na medium transparent plastic sachet ng droga na may bigat na 40 gramo at tinatayang nagkakahalaga ng P272,000, isang Yamaha Mio-125 motorsiklo, at buy bust money.
Ayon sa mga awtoridad, matagal nilang isinalang sa surveillance ang raket ng suspek na itinuturong notoryus na tulak sa lungsod.
Gamit umano ng suspek ang motorsiklo sa kaniyang ilegal na negosyo para mabilis na matakasan ang mga awtoridad kung siya’y masusukol.
Dagdag ni Arcangel, ilang drug personalities na ang kanilang nadakip at naikulong sa mas pinalakas na isinasagawa nilang anti-illegal drugs campaign.
Kasalukuyan nang nakapiit ang suspek sa detention cell ng pulisya sa lungsod at dinala sa EPD Crime laboratory ang mga ebidensiya para sa chemical analysis.
Nakatakdang kasuhan si Turalba ng paglabag sa Section 5 at 11 ng Article ll ng RA 9165 sa Marikina City Prosecutor’s Office.
(EDWIN MORENO)
