HATAW! D'yaryo ng Bayan hatawtabloid.com
NADAKIP ang dalawang indibidwal na pinaniniwalaang mga tulak at nakatala bilang high value target sa ikinasang anti-drugs operation ng Provincial Intelligence Unit at Provincial Drug Enforcement Unit sa bayan ng San Mateo, lalawigan ng Rizal, nitong Linggo, 4 Disyembre.
Sa ulat ni P/SSgt. Ederico Zalavaria, ng Rizal Provincial Intelligence Unit (PIU) kay Rizal PPO Provincial Director P/Col. Dominic Baccay, kinilala ang mga suspek na sina Felipe Galono, alyas Sano, at Daria Jane Dawal, kapwa mga residente sa Marang Rd., Brgy. Maly, sa nabanggit na bayan.
Dakong 3:15 am kahapon nang maaresto ng PIU at PDEU sa drug operation sina Galono at Dawal sa naturang lugar.
Nasamsam mula sa mga suspek ang 11 sachet ng hinihinalang shabu, may timbang na 45 gramo at tinatayang nagkakahalaga ng P306,000; isang sling bag, at buy-bust money.
Kasalukuyan nang nakapiit ang mga suspek sa detention cell ng pulisya para sa nararapat na dokumentasyon at disposisyon. (EDWIN MORENO)
