HATAW! D'yaryo ng Bayan hatawtabloid.com
PINALAWIG pa ng Quezon City Police District (QCPD) ang ipinaiiral nitong programang “Oplan Bisita Eskuwela” para lalo pang matiyak ang ligtas at matiwasay na kapaligiran sa pag-aaral sa buong lungsod.
Ang hakbangin ng QCPD sa pamumuno ni Director, PBrig. Gen. Randy Glenn Silvio ay pagtalima sa mga direktiba ni Philippine National Police Chief, PGen. Jose Melencio Nartatez, Jr., at ni PMGen. Anthony Aberin, National Police Regional Office Director.
Dinagdagan ng QCPD ang presensiya ng mga pulis sa pamamagitan ng pagpapakalat ng mga tauhan sa mga pasukan ng paaralan sa oras ng pagdating at pag-uwi ng mga mag-aaral at guro. Nagsasagawa ng mga regular na patrol at roving security sa pagitan ng mga nasabing oras upang matiyak ang patuloy na pagbabantay para mapigilan at maitaboy ang mga posibleng banta.
Bukod dito, isinasagawa ng QCPD ang mga kampanya sa impormasyon laban sa anti-bullying at paghahanda sa sakuna upang mapataas ang kamalayan at kahandaan ng mga mag-aaral, guro, at kawani ng paaralan.
Kaugnay nito, sa isang pagpupulong ng QC Local Government Unit (LGU) sa pamumuno ni Mayor Joy Belmonte nitong 23 Hunyo 2026, kasama ang QCPD, tinalakay ang mas pinalawig na pagpapatupad ng mga estratehiya para sa seguridad ng lungsod laban sa mga karahasan sa loob ng paaralan o kaugnay nito.
Ang mga hakbang na ito, sa pakikipagtulungan at pakikipag-ugnayan sa Department of Education (DepEd), ay kinabibilangan ng mga safety drill, pagpapataas ng presensiya ng pulisya, at mga engineering intervention upang mapabuti ang seguridad sa mga paaralan.
Hinihimok ng QCPD ang aktibong pakikilahok ng mga magulang, guro, at mga pinuno ng mga mag-aaral sa mga inisyatiba sa kaligtasan.
Patuloy ang isinasagawang pagsubaybay upang matiyak na ang lahat ng hakbang ay nagpoprotekta sa mga mag-aaral habang itinataguyod ang kanilang mga karapatan, pagiging pribado, at sa pangkalahatang kapakanan. Sa oras ng emergency, pinapayohan ang publiko na tumawag sa E911 o sa QC Helpline 122. (ALMAR DANGUILAN)
