HATAW! D'yaryo ng Bayan hatawtabloid.com
INIHIMLAY sa kanyang huling hantungan si Ateneo varsity player Rene Clert “Bobet” Baterbonia sa isang sementeryo ng kanilang bayan sa Talacogon, Agusan del Sur.
Libo-libong tao ang pumila sa paligid ng bayan sa araw ng paghihimlay patungo sa bagong tatag na Barangay Labnig Memorial Cemetery, kung saan nagpaalam ang mga pamilya, kaibigan, at kamag-anak sa tinaguriang “Mr. Most Valuable Player (MVP)” ng Ateneo de Davao.
Hindi napigilan ng ina ni Rene na si Rovelyn ang muling mapaluha sa taos-pusong pasasalamat sa lahat ng nagmamahal sa kaniyang anak na si Bobet sa panahon ng pagdadalamhati ng kanilang pamilya sa kaniyang maagang pagpanaw.
Si Baterbonia, 18 anyos, ay pumanaw noong 8 Hunyo kasama ang kanyang Ateneo de Manila University teammate na si Divine Adili mula sa Nigeria sa isang malagim na insidente ng pagkalunod sa team-building activity ng Blue Eagles sa Dipaculao, Aurora.
Kadarating niya sa Maynila noong linggong iyon ilang araw pagka-graduate ng senior high school sa Ateneo de Davao, kung saan pinangunahan niya ang koponan sa maraming panalo sa rehiyon kabilang ang kauna-unahang Palarong Pambansa title ng Davao Region noong 2025 sa Laoag, kung saan siya itinanghal na MVP.
Samantala, ipinasa ng Talacogon ang isang ordinansa na nagdedeklarang ang 8 Hunyo ay itinatakdang “Rene Clert ‘Bobet’ N. Baterbonia Day” bilang pagkilala sa kanyang pamana at kontribusyon sa lokal na pamahalaan sa pamamagitan ng sports.
Pinangalanan din ng Ateneo de Davao ang kanilang Senior High School courts bilang “Rene Bobet Baterbonia Covered Courts”.
