13 arestado sa vote buying sa Cagayan

UMABOT na sa 13 indibidwal ang naaresto ng mga awtoridad sa isang barangay sa lalawigan ng Cagayan dahil sa pamimili ng boto.

Sa report na nakarating sa National Election Monitoring Center (NEMC) ng AFP, naaktohang namimigay ng sobreng may pera ang mga indibidwal sa Brgy. Curva, Pamplona, Cagayan.

Kasalukuyang nasa kustodiya ng Pamplona Municipal Police station ang naarestong mga suspek.

Hindi inilagay sa report kung magkano ang halaga ng bawat sobreng ipinamumudmod sa mga residente.

Ang Cagayan ay isa sa election watch list areas na tinutukan ng militar at PNP ngayong halalan.

Sa katunayan, dahil mainit ang takbo ng politika sa nasabing lugar, wala ni isang peace covenant ang nilagdaan ng mga magkakatunggaling kandidato maging sa Quirino at Ifugao.