9 bebot nasagip sa Parañaque bar

NASAGIP ang siyam na babaeng hinihinalang biktima ng human trafficking, sa entrapment operation ng NBI sa isang bar sa Parañaque City kamakalawa.

Pinasok ng mga tauhan ng NBI ang isang bar sa Sucat Road makaraan ang dalawang buwan pagmamanman sa lugar nang makatanggap ng impormasyon na lungga ito ng prostitusyon.

“Na-determine namin na positive, may prostitution. Nag-o-offer sila ng babae for sex kaya nagkaroon ng entrapment operation,” ayon kay Atty. Bernard dela Cruz, executive officer ng NBI.

Nang may maganap na bayaran sa alok na pakikipagtalik, dito na sinimulan ng NBI ang operasyon.

Tumambad sa kanila ang mga babae na halos walang saplot. Ang ilan ay nagtangka pang magtago ngunit naabutan din.

Isang lalaki ang naabutan sa loob ng bar ngunit tumangging may kinalaman siya sa kalakaran doon.

Ngunit ilang saglit lang, biglang nawala ang lalaki. Nagpaalam siyang gagamit ng banyo ngunit hindi na lumabas.

Hinihinalang sa isang puwang sa kisame ng banyo dumaan ang lalaki para tumakas.