Resign petition vs Tolentino ibinasura ng Palasyo

IDINEPENSA ng Malacañang si MMDA Chairman Francis Tolentino mula sa panawagang magbitiw sa puwesto dahil sa kabiguang mapaluwag ang daloy ng mga sasakyan sa kahabaan ng EDSA.

Ginawa ni Communication Sec. Sonny Coloma ang pahayag nang umani ng suporta ang isang online petition na humihirit sa pagbibitiw ni Tolentino dahil sa sinasabing kapalpakan at abala na siya sa pangangampanya.

Sinabi ni Coloma, patuloy ang pagtitiwala at kompiyansa ni Pangulong Benigno “Noynoy” Aquino III kay Tolentino dahil ipinakita niya ang kakayahan sa pagganap ng tungkulin sa nakalipas na limang taon.

Ayon kay Coloma, katunayan, si Tolentino ang nagmungkahi kay Pangulong Aquino na i-deploy ang PNP-HPG para mapatino at mapaluwag ang trapiko sa EDSA.

Iginiit ng kalihim na ang pag-iikot ni Tolentino sa mga probinsiya ay bahagi ng kanyang official functions upang ipaliwanag  ang kanyang nalalaman at karanasan sa disaster preparedness bilang taga-pangulo ng Metro Manila Disaster Risk Reduction and Management Council.