Nagkabit ng jumper nangisay sa koryente

PATAY ang isang lalaki nang makoryente dahil sa pagkakabit ng jumper sa linya ng koryente sa poste ng Manila Electric Company kahapon ng umaga sa Pasay City.

Agad nalagutan ng hininga ang biktimang kinilala lamang sa alyas Kilabot, nasa hustong gulang, residente sa panulukan ng Taft Avenue Extension at Park Avenue ng lungsod.

Batay sa ulat ni Inspector Jolly Soriano, commander ng Pasay City Police Community Precinct (PCP-6), nangyari ang insidente dakong 10:35 a.m. sa naturang lugar.

Bago ang insidente, pinutulan ng mga tauhan ng Meralco ng koryente ang ilang residente dahil sa illegal na koneksiyon base na rin sa reklamo ng mga biller.

Dahil walang supply ng koryente ang ilang residente, sinasabing  inutusan nila ang biktima na umakyat sa poste ng Meralco para muli silang mailawan.

Habang ikinakabit ng biktima ang ilegal na koneksiyon ng koryente ay nangisay siya dahil sa lakas ng boltahe na pumasok sa kanyang katawan  na nagresulta nang agaran niyang kamatayan.