Mag-utol na Fil-Indians itinumba sa canteen

DAGUPAN CITY – Kapwa patay ang magkapatid na Fil-Indians makaraan barilin sa loob mismo ng kantina na pag-aari ng kanilang ate sa lungsod ng Dagupan kamakalawa.

Ayon kay Supt. Cristopher Abrahano, hepe ng Dagupan City Police Station, kinilala ang mga biktimang sina San Jey Khatri, 30, at Rajesh Khatri, 35, residente ng Brgy. Bued sa bayan ng Calasiao.

Nagtungo ang dalawa sa kantina ng kanilang ate kasama ang kanilang ina para maghapunan nang biglang dumating ang dalawang hindi nakilalang mga suspek na nakasuot ng helmet at sila ay pinagbabaril.

Isinugod sa pagamutan ang dalawa ngunit idineklarang dead on arrival ang nakababatang Khatri, habang binawian ng buhay ang kapatid na nilalapatan ng lunas.

Negosyo ang isa sa tinututukang anggulo sa insidente lalo’t kapwa negosyante ang mga biktima.