1 patay, 1 sugatan sa ambush sa Malabon

PATAY ang isang caretaker habang kritikal ang kalagayan ng isa pa makaraang pagbabarilin habang lulan ng pampasaherong jeep ng dalawang lalaking sakay ng motorsiklo sa Malabon City kamakalawa ng hapon.

Hindi na umabot nang buhay sa Valenzuela City Emergency Hospital ang biktimang si Ernesto Galvan, 48, ng 301 M.H. Del Pilar, Maysilo ng nasabing lungsod.

Habang nilalapatan ng lunas sa nasabi ring pagamutan ang isa pang biktimang si Arnel Pilapil, 40, ng San Lorenzo St., Panghulo ng nasabing lungsod.

Patuloy ang masusing imbestigasyon ng mga awtoridad upang matukoy ang motibo sa insidente at pagkakakilanlan ng mga salarin.

Sa ulat nina PO3 Roger Gonzales at PO3 Alexander Dela Cruz, batay sa salaysay ng jeepney drver na si Rolando Valdez, 47, dakong 4 p.m. nang maganap ang insidente habang binabagtas nila ang kahabaan ng San Vicente St., Brgy. Maysilo.

Napag-alaman, hinarang ang jeepney ng mga suspek na lulan ng motorsiklo, tinutukan si Valdez at pinababa.

Nang makita ng mga suspek ang target nilang si Pilapil, agad pinaputukan ngunit nakapagtago sa kapwa pasahero na si Galvan na nasapol ng bala sa ulo.

Muling pinaputukan ng mga suspek si Pilapil at pagkaraan ay mabilis na tumakas.