2 paslit patay sa sunog mula sa katol

CAGAYAN DE ORO CITY – Natupok ang katawan ng magpinsang paslit nang hindi makalabas sa nasusunog na bahay sa Purok 9-B, North Poblacion, Maramag, Bukidnon, kamakalawa ng gabi.

Kinilala ang mga biktimang si Riza Mae Paas, 9, at Angela, 7, residente sa nasabing lugar.

Ayon kay PO3 Karen Quijal ng Maramag Police Station, ang naiwang sinindihang katol ang itinuturong dahilan kung bakit sumiklab ang apoy.

Natuklasan, wala sa bahay ang mag-asawang sina Rodendo at Pacencia Corpuz nang mangyari ang sunog at mga apo lamang nila ang naiwan kamakalawa ng gabi.

Sugatan at naka-confine sa pagamutan ang isa pang apo ng mag-asawa na si Renzon.

Tatlo pang mga apo ng mag-asawa ay nakaligtas mula sa malaking sunog.