Sanggol, 3 pa sugatan sa salpukan ng 2 motorsiklo

DAGUPAN CITY – Sugatan ang apat katao kabilang ang isang 9-buwan gulang na sanggol makaraang magsalpukan ang dalawang motorsiklo sa bayan ng Agno, Pangasinan kamakalawa.

Kinilala ang mga biktimang si Gilbert Daragay, at ang mga sakay niyang sina Jennyfer Driza, 18, at Veronica Bauson, 9-buwan gulang, pawang mga residente ng Brgy. Aloleng Agno, at ang nakasalpukan na si Freddie Garcia, residente rin ng nabanggit na lugar.

Sa impormasyon, binabagtas ng mga biktima ang magkaibang direksiyon lulan ng dalawang motorsiklo nang hindi mapansin ni Garcia ang sinasakyan ng tatlong mga biktima.

Bunsod nito, tumilapon sa kalsada ang mga biktima.

Napag-alaman, mabilis ang pagpapatakbo ni Garcia na sinasabing nasa impluwensiya ng alak nang maganap ang insidente.