Higit 70K OFWs gagamit ng postal voting — Comelec

MAGPAPATUPAD ng postal voting ang Commission on Elections (Comelec) para sa mahigit 70,000 Overseas Filipino Workers (OFWs) na nais bomoto sa 2016 elections.

Batay sa Comelec data, kabuuang 75,363 voters ang maaaring bomoto sa 26 embassies o post sa mga tukoy na bansa.

Ito ay kinabibilangan ng Lisbon (European Region); Bangkok, Brunei, Chongqing, Dhaka, Dili, Guangzou, Islamabad, Jakarta, Macau, Manado, Meco Kaohsiung, Meco Taichung, Meco Taipei, New Delhi, Phnom Penh, Shanghai, Vientiane, at Xiamen (Asia Pacific Region); Abuja, Amman, Cairo, Muscat, Nairobi, Pretoria, and Tehran (Middle East and African Region).

Sa kabilang dako, kabuuang 1.1 million voters para sa Overseas Absentee Voting (OAV) mula sa 30 posts partikular sa North at Latin America, Europe, Asia Pacific, at Middle East, ang gagamit ng automated election system sa pamamagitan ng Voter Counting Machines (VCM).

Ang OAV voters ay boboto lamang para sa posisyon ng president, vice president, senators, at party-list group.

Magsisimula ang botohan sa Abril 9 hanggang Mayo 9, 2016.