3 suspek patay, pulis, 5 sibilyan sugatan sa Zambo shootout

ZAMBOANGA CITY – Tatlong suspek ang napatay habang isang pulis at limang sibilyan ang sugatan sa nangyaring shootout sa Brgy. Poblacion sa bayan ng Talusan, Zamboanga Sibugay kahapon.

Base sa report ng Zamboanga Sibugay police provincial office (ZSBPPO), isinagawa ang operasyon dakong 3:50 a.m. sa pangunguna ng mga kasapi ng Provinial Public Safety Company (PPSC) at ng iba pang mga unit ng PNP sa kanilang “one time-big time operation.”

Ito ay kasunod nang inilabas na search warrant ng korte batay sa paglabag sa RA 10591 o ang Comprehensive Firearms and Ammunition Regulation Act.

Pinasok ng mga awtoridad ang target na dalawang bahay sa lugar na nagresulta sa palitan ng putok nang makipagbarilan ang mga suspek.

Napatay sa shootout sina Kiking Lim, Basilisa Llanos at ang isang dating barangay kagawad na si Edris Mohammad.

Kabilang sa mga sugatan ang dalawang menor de edad na sina Fatima Ayesha at Kisma Mohammad, habang ang tatlong iba pa ay sina Lydia Mohammad, Albaina Mohammad at Noriba Amsani.

Ang sugatang pulis na si PO2 Noriel Go Laureta, kasapi ng Provincial Public Safety Company, ay isinugod sa Ipil Provincial Hospital.

Habang ang mga sugatang sibilyan ay dinala sa Olutanga Rural Health Unit.

Narekober ng mga pulis mula sa bahay ng napatay na dating barangay kagawad ang isang unit ng M1 garand rifle at mga bala.

Habang sa bahay ng babaeng napatay ay anim matataas na kalibre ng baril ang nakuha kabilang ang isang unit ng AK47, carbine, baby armalite, M4, caliber .45 pistol, at isang unit ng 12 gauge shotgun, kasama ang maraming mga bala ng naturang nakuhang mga baril.