Preso uminom ng asido, tigok

LA UNION – Hindi na umabot nang buhay sa pagamutan ang isang preso makaraang uminom ng muriatic acid kamakalawa.

Kinilala ang biktimang si Julius Alabanza, 41, residente ng Brgy. San Nicolas Central sa bayan ng Agoo.

Batay sa impormasyon mula sa municipal jail, nagpaalam si Alabanza sa mga jail guard na gagamit ng banyo ngunit pagkalabas ay bigla na lamang sumakit ang tiyan at sumuka.

Itinakbo sa pagamutan ang biktima ngunit hindi na nailigtas pa ng mga doktor.

Napag-alaman, namatay ang biktima dahil sa pagkasira ng kanyang laman-loob bunsod nang ininom na kemikal.

Hindi pa malinaw kung bakit ito ginawa ng nasabing preso.