China pumayag sa itatatag na Code of Conduct — PNoy

KOMBINSIDO si Pangulong Benigno “Noynoy” Aquino III na tagumpay at mabunga ang kanyang huling pagdalo sa ASEAN Summit sa Kuala Lumpur, Malaysia.

Magugunitang sa ASEAN meetings, itinodo ni Pangulong Aquino ang pagbatikos sa China habang kaharap ang Chinese Premier at inisa-isa ang pagpasok ng Chinese vessels sa karagatan ng Filipinas.

Sa kanyang arrival statement kahapon ng madaling araw, sinabi ni Pangulong Aquino na kanyang idiniin sa kapwa ASEAN members at dialogue partners, na kung walang estabilidad, walang kaunlaran.

Ayon kay Pangulong Aquino, sumang-ayon ang nakararami na dapat panindigan ang patas, mapayapa at makatwirang resolusyong naaayon sa pandaigdig na batas.

Maging ang China aniya ay nagsabi na ring kailangan ng ‘Code of Conduct of Parties on the South China Sea.’