Mag-aama timbog sa 12 chop-chop motorcycles, shabu sa drug ops sa Isabela

CAUAYAN CITY, Isabela – Tinatayang 31 grams ng shabu at 12 chop-chop na motorsiklo ang nakompiska ng mga pulis sa drug operation sa Mabini, Santiago City dakong 9 a.m. kahapon.

Ayon kay Sr. Supt. Alexander Santos, director ng Santiago City Police Office, ang naaresto nilang tatlong lalaking mag-aama ay ibeberipika pa nila ang pangalan dahil ayaw magsalita.

Tumangging sumama sa kanilang operasyon ang mga opisyal ng Brgy. Mabini, Santiago City na kanilang inimbitahan upang sila sana ang kikilala sa mga suspek.

Ayon kay Senior Supt. Santos, magsasagawa sila ng berepikasyon sa Land Transportation Office upang makilala ang may-ari ng nakompiskang mga motorsiklo para malaman kung ninakaw ang mga ito.

Nasa drug watchlist ng SCPO ang tatlong naaresto sa operasyon.